મામાનું ઘર કેટલે ?

અત્યારે વેકેશનનો સમય ચાલી રહ્યો છે. બધા બાળકો તેમના મામાના ઘરે પહોંચી ગયા હશે અથવા જવા માટે તલપાપડ હશે. પરંતુ હું તો જન્મ થયો ત્યારથી લઇને અત્યાર સુધી મામાના ઘરે જ છું. અને હમણાં તો મામા પણ અહીં જ છે પછી તો કહેવું જ શું ?

મને એ સમજાતું નથી કે મોટાભાગે ઘર નાના બનાવે તો પછી મામાનું ઘર કેમ કહેવાય ? મને તો જવાબ નથી મળતો તમને આનો જવાબ મળે તો મને કહેજો.

ખરૂ કહું તો આ મામાઓ બહુ મજાના માણસ હોય છે હો...કારણ કે બે મા બરાબર એક મામા થાય અને આપણી બધી જીદ કે માગણીઓ તેના દ્વારા પુરી થાય. મારે પણ એક મામા છે જેનું નામ શ્રીકાંત છે. સરસ નામ છે ને ? હોય જ ને મામા કોના ? હા..હા..હા...

જુઓ મામાને લગતું આ એક સરસ મજાનું બાળ ગીત છે જે મને તો ગમે જ છે તમને જરૂર ગમશે.

"મામાનું ઘર કેટલે,

દીવા બળે એટલે,

દીવા મેં તો દીઠા,

મામા લાગે મીઠા.

મામી મારી ભોળી,

મીઠાઈ લાવે મોળી,

મોળી મીઠાઈ ભાવે નહિ,

રમકડાં તો લાવે નહિ."

તમને એક ખાનગી વાત કહું મારે હજુ મામી છે જ નહીં પરંતુ હું એવી જ મામી શોધીશ જે મારા માટે મીઠી મીઠાઇ લાવે કે જે મને ભાવે અને ખુબ બધા રમકડાં પણ લાવે ખરૂને ?

આગામી પોસ્ટમાં મારે તમને ઘરના બધા સભ્યોનો પરિચય પણ કરાવવો છે જેમાં આ મામાનો ફોટો પણ મુકીશ પરંતુ અત્યારે તો આટલું જ અને હા તમને પેલા પ્રશ્નનો જવાબ મળે તો મને કહેવાનું ભુલતા નહીં હો...

- તમારી જિત્વા